كالعاده

كالعاده تستمر المجازر الاسرائيليه ضد ابناء الشعب الفلسطينى ...اكتر من 150 شهيد و200 جريح اليوم معظمهم من المدنيين فى غارات اسرائيليه على قطاع غزه

كالعاده يتسابق قادتنا الاشاوس للدعوه لقمه عربيه طارئه لبحث الهجمات الاسرائيليه... امير قطر يدعو لعقد قمه عربيه طارئه لبحث الوضع فى غزه.

كالعاده يعقد المواطنين العرب امالا عريضه على القمه العربيه على امل اى رد فعل ايجابى من قادتهم.

كالعاده ستخرج قرارات ونتائج القمه من نوعيه نحن نشجب ونستنكر وندين وندعو لوقف ونبكى ....الخ الخ

كالعاده ستخرج المظاهرات الحاشده فى كل المدن العربيه للتنديد بالعدوان.

كالعاده سيبقى الوضع على ماهو عليه ويستمر الصمت العربى والعالمى على الوضع ويخلد الجميع للنوم ليلا هانئين وكأن شيئا لم يكن.

وكالعاده ليس للفلسطنيين سوى الله يلجأون اليه لرفع الظلم عنهم.

واضح ان هنعيش حياتنا كلها ونموت وكالعاده ليس لنا اى قيمه او اهميه!!!!

فى الجووووون

اللى حصل الليله دى فى العراق ولا فى الاحلام والله حدث تاريخى
الشجاع منتظر الزيدى اثبت ان لسه فى عندنا رجاله بجد....رجاله مش بتخاف لا من حراسه ولا رصاص ولا تعذيب ولاصواريخ ولا غيره....رجاله بتقول اللى فى قلبها وقلوبنا بمنتهى الشجاعه .
وانا بأتفرج على الفيديو مكنتش مصدق ..صاروخين ارض جو طراز(شوز16) موجهين ولا اروع
مع انى كان نفسى ان الكوره تلبس فى الجون ونشوف وش سيادته والجزمه فى بقه الكريم...ولا انه بدل الجزمه الغاليه يكون شبشب (زيكو) من اللى ب 2 جنيه.. بس معلش خيرها فى غيرها وكفايه ان التاريخ هيذكر ان رئيس اكبر دوله اتهان اهانه ما اتهانهاش رئيس فى مؤتمر ولا حتى رئيس (جمهوريه شومبونجو الشقيقه)وكفايه مذله انه ما انضربش لابصواريخ ولا رصاص انما بالجزمه زى ال....
شكرا يا منتظر حقيقى سلمت يداك عملت اللى عليك وكان الله فى عونك فى الايام اللى جايه.
اما المعلم فكفايه عليه ان نهايته كانت تحت الجزمه.
وبالنسبه للجزمه ففيه ناس اقترحت انها تتحط فى متحف والناس تتفرج عليها وتتصور معاها واظن انه اقتراح جامد واقل واجب ممكن نعمله للذكرى الخالده دى .
وحقيقى كفايه الجمله المعبره اللى عبرت بيها الصحافه الامريكيه عن الموقف

He went there in a surprise...but he found another big surprise

TWENTY FOUR

فى مره من المرات النادره اللى باتابع فيها الدراما الاجنبيه وبالصدفه شفت حلقه من مسلسل (24) على قناه

(Show series) ومع انى مش متابع جيد للمسلسلات الامريكيه الا ان احداث المسلسل اجبرتنى على متابعته باستمرار وعلى فكره بالصدفه برضه اكتشفت ان ده الموسم السادس للمسلسل.
المهم كان عندى بعض الملاحظات على المسلسل:-

اولا:كالعاده يستمر الاعلام الامريكى فى قلب الحقائق وتزييف الواقع ومحاوله تصوير الجندى الامريكى على انه ذو مبادئ وصاحب رساله ساميه للبشريه ..يكره قتل الابرياء المدنيين ويحرص على سلامتهم حتى لو كان الثمن حياته!!
لو قارننا الصوره دى بالواقع,, الواقع اللى فيه ملايين القتلى من المدنيين العراقيين بسبب حرب لامعنى لها غير مجرد رغبه ساديه عند مجرم حرب ,,ده غير المدنيين الباكستانيين والافغان اللى بيموتوا كل يوم فى غارات امريكيه يقال انها تستهدف مقاتلى طالبان وفى كل مره يبرر المسئولين الامريكيين الحكايه بأنها خطأ غير مقصود!!
كل ده غيرعمليات التعذيب اللااخلاقيه فى سجون الاحتلال فى العراق وفى كارثة جوانتانامو وغيرها وغيرها....واقع مخالف تماما لاحداث المسلسل.

ثانيا:الصوره اللى بيحاول الاعلام الامريكى تقديمها للانسان العربى المسلم تنطبق عليها قاعده
مسلم=ارهابى
مسلم عربى=ارهابى متطرف متخلف
المسلسل بيصور الانسان المسلم على انه ارهابى كل هدفه قتل وترويع الامنيين الابرياء ولو اضفنا له صفه العربى يكون مثال للتخلف والعدوانيه والتطرف وبالتالى اى انسان فيه الصفتين دول بيكون محل اتهام حتى ولو كان انسان مسالم محب للآخرين.

ثالثا:بالرغم من كل الاكاذيب اللى بيقدمها المسلسل والصوره الغير واقعيه لأحداثه الا انى بصراحه معجب بالحبكه الدراميه فى المسلسل واحداثه المتشابكه الغير متوقعه ومستوى اخراجه ..حقيقى مستوى ممتاز للدراما الامريكيه الاولى عالميا وطبعا الكلام ده بعيد تماما عن الهبل والاستخفاف اللى بيحصل فى الدراما المصريه
فعلا مفيش مجال للمقارنه!!!

كله عند العرب صابون

خبر غريب سمعته وهو ان بعض الدول العربيه على استعداد لضخ مبلغ 1000 مليار دولار للولايات المتحده لمساعدتها على تجاوز الازمه الماليه الحاليه واللى بتهدد قطاعات ماليه رئيسيه بالانهيار
بصراحه انا لما شفت الرقم الضخم ده شكيت فى الخبروحسيت انه ممكن تكون غلطه مطبعيه ولا حاجه بس لما كملت الخبر اتأكدت ان الرقم ده مظبوط
الخبر ده خلى افكار كتيييير تيجى على بالى ...... يعنى لما الولايات المتحده مرت بازمه اقتصاديه كبيره قامت الدول العربيه بمنتهى السرعه بتوضيح استعدادها للتبرع بارقام خياليه للولايات المتحده لكن لما يكون اللى محتاج المساعده ناس زى الصوماليين او العراقيين او الفلسطينيين فيعنى لو طلع من ذمة الدول دى 1000 جنيه يبقى كتر خيرهم بجد والناس دى تبوس ايدها شعر ودقن على الكرم الزايد ده
حاجه تانيه......ان احد اسباب الازمه الماليه الامريكيه هو الحرب على العراق واللى خصصت لها الولايات المتحده ميزانيه مفتوحه ...فلما عجزت الموازنه الامريكيه عن تغطيه نفقات الحرب وبدأ الاقتصاد الامريكى فى التداعى تطوعت الدول العربيه لمساعده الولايات المتحده (الشقيقه) لسد العجز وتغطيه باقى النفقات ..يعنى بالبلدى كده هتبقى الدول دى هى اللى بتمول الحرب على العراق!!!!!
الغريب كمان ان اغلب الشعوب العربيه بتعانى من الفقر الشديد وارتفاع الاسعار المبالغ فيه وزياده نسب البطاله وغيرها وغيرها ومع ذلك محدش حاول يتحرك علشان يحل المشاكل دى او حتى يوفر مليار يتيم للشباب العربى الغلبان ....انما عشان عيون امريكا واقتصاد امريكا تتوفر الاف المليارات وفى غمضه عين
صحيح كله عند العرب صابون....وكوسه وصلصه وكنافه بالمخلل كمان!!!!!!